المدونة · نوفمبر ٢٠٢٦
محتويات بروفايل الشركة: تكتب إيه في كل صفحة؟ وإيه اللي بيزيد في بروفايل شركة مقاولات
بروفايل الشركة الكويس بيمشي بالترتيب ده: مين إنتم بالأرقام، بتعملوا إيه، عملتوه لمين وإمتى، بتشتغلوا إزاي، ومين هيرد على التليفون. كل صفحة لازم تثبت حاجة واحدة للقارئ، وشركة المقاولات بتزود عليهم المشاريع بقيمتها وسنتها، والمعدات، والفريق الفني، وشهادة القيد في اتحاد المقاولين.
إيه هو بروفايل الشركة، ومين بيقراه؟
بروفايل الشركة ملف بيعرّف شركتك لحد لسه مايعرفهاش: عميل جديد، أو لجنة مناقصة، أو شريك أو موزّع بيفكر يشتغل معاك. «كيف اعمل بروفايل للشركة؟ وماذا أكتب فيه؟» سؤال متكرر على Quora العربي، وجوجل في مصر بيقترح «محتويات بروفايل الشركة» و«كتابة بروفايل شركة». والإجابة بتبدأ من القارئ مش من التصميم، لأن كل قارئ داخل بسؤال واحد:
- العميل: عملتوا قبل كده حاجة شبه اللي أنا محتاجها؟
- لجنة المناقصة: الورق كامل؟ والأرقام اللي في البروفايل هي نفسها اللي في المستندات؟
- الشريك أو الموزّع: حجمكم قد إيه، وتقدروا تكمّلوا معايا؟
كل صفحة في البروفايل لازم تجاوب على سؤال من دول. الصفحة اللي مابتجاوبش على حاجة بتتقلب من غير ما تتقري.
إيه محتويات بروفايل الشركة بالترتيب؟
ده الترتيب اللي بنشتغل بيه، وجنب كل قسم الحاجة اللي لازم يثبتها للقارئ:
- الغلاف: اسم الشركة، شغلكم في سطر واحد، وسنة البروفايل. بيثبت إن الملف حديث.
- مين إحنا بالأرقام: سنة التأسيس، حجم الفريق، المدن أو الدول اللي بتشتغلوا فيها، وأهم رقم عندكم. بيثبت إنكم شركة حقيقية وحجمكم قد إيه.
- المشكلة اللي بتحلّوها: صفحة بتوصف مشكلة العميل بكلامه هو. اختيارية، بس بتفرق. بتثبت إنكم فاهمين شغله.
- الخدمات أو المنتجات: كل خدمة بنطاقها: بتشمل إيه، لمين، وبتتسلّم إزاي. بيثبت إنكم بتعملوا حاجة محددة، مش «كل حاجة».
- الشغل والإثبات: مشاريع بأسمائها، عملاء بأسمائهم (بموافقتهم)، أرقام، تقييمات، وصور حقيقية. بيثبت إنكم عملتوها قبل كده. ده أهم قسم في الملف كله.
- طريقة الشغل: الخطوات من أول مكالمة لحد التسليم، والوعود اللي تقدروا تلتزموا بيها فعلًا. بيثبت إنكم هتسلّموا.
- الفريق والإدارة: الأسماء والخبرات اللي بتفرق في الشغل. بيثبت مين المسؤول.
- الأوراق والشهادات: السجل التجاري والبطاقة الضريبية وأي شهادة جودة عندكم فعلًا. بيثبت إنكم تقدروا تتعاقدوا.
- التواصل في آخر صفحة: اسم شخص، موبايل، إيميل، عنوان، الموقع، وكود QR. بيثبت إن فيه حد هيرد.
طب والرؤية والرسالة؟ لو عندكم فيهم كلام حقيقي، سطرين جوه «مين إحنا» كفاية. في التلات بروفايلات اللي في الجدول تحت، مفيش ولا صفحة لوحدها اسمها «الرؤية والرسالة».
البروفايل كام صفحة، وكل قسم ياخد قد إيه؟
فتحنا تلات بروفايلات عملناها السنة دي صفحة صفحة: بروفايل Webdazzle نفسه (١٣ صفحة)، وبروفايل شركة استشارات إدارية (١٧)، وبروفايل شركة برمجيات (١٨)، وقسّمنا صفحاتها على الأقسام اللي فوق:
| القسم | Webdazzle | استشارات | برمجيات |
|---|---|---|---|
| الغلاف | ١ | ١ | ١ |
| مين إحنا | ١ | ٥ | ٢ |
| مشكلة العميل | ٠ | ٢ | ١ |
| الخدمات | ١ | ٤ | ٩ |
| طريقة الشغل | ١ | ٢ | ٣ |
| الشغل والإثبات | ٨ | ٢ | ٠ |
| التواصل | ١ | ١ | ٢ |
| المجموع | ١٣ | ١٧ | ١٨ |
«مين إحنا» فيها التعريف والمؤسس وليه مختلفين، و«مشكلة العميل» فيها مين بنخدم، و«الشغل والإثبات» يعني مشاريع وعملاء وتقييمات. التلاتة مختلفين لأن الإثبات اللي عند كل شركة مختلف. بروفايلنا عنده شغل كتير يتعرض، فراحت ٨ من ١٣ صفحة للشغل. شركة الاستشارات عندها تقييمات عملاء منشورة، فخدت صفحتين لوحدها. وشركة البرمجيات ركّزت على شرح الخدمات (٩ من ١٨ صفحة) وطريقة التسليم والوعود.
وعلى ٧ بروفايلات عملناها، عدد الصفحات كان ٩ و١٣ و١٤ و١٧ و١٧ و١٨ و٢٧ (الأخير بالعربي بس)، يعني ٥ من ٧ بين ١٣ و١٨ صفحة. القاعدة اللي طلعنا بيها: عدد الصفحات بيتحدد بالإثبات اللي عندك، مش العكس. ولو سؤالك عن التكلفة، كتبنا عنها في سعر تصميم بروفايل شركة في مصر.
إيه الأخطاء اللي بتقفل البروفايل من أول صفحات؟
- صفحات رؤية ورسالة وقيم قبل ما القارئ يعرف إنتم بتعملوا إيه.
- مفيش ولا رقم: «خبرة طويلة في المجال» بدل «اتأسسنا سنة كذا ونفذنا كذا مشروع».
- صور ستوك: ونش أو مبنى أو فريق مبتسم من بنك صور. صورة من موقع شغلكم، حتى بالموبايل، بتقول أكتر.
- «رائدة» و«الأفضل» من غير دليل جنبها.
- كلمة «معتمدين» أو لوجو شهادة مش عندكم. أول ما حد يطلب الشهادة، الملف كله بيخسر مصداقيته.
- آخر صفحة من غير اسم شخص ورقم مباشر. إيميل عام لوحده مش تواصل.
- ملف تقيل مايتبعتش: أول نسخة من بروفايل ١٧ صفحة عملناه طلعت ١٥٫٧ ميجا بسبب طريقة معالجة الصور، ونزلت لحوالي ٢ ميجا من غير ما الشكل يتغير.
- بيانات قديمة: أحدث مشروع من سنين، أو رقم موبايل مابيردش.
بروفايل شركة مقاولات: إيه اللي بيزيد عليه؟
لما جمعنا اقتراحات جوجل في مصر في أكتوبر ٢٠٢٦، «بروفايل شركة مقاولات» كانت أكتر عبارة عن البروفايلات طلع لها صيغ: أكتر من ٢٠ (pdf، word، جاهز للتعديل، قوالب…). وطلب حقيقي على منصة مستقل بيلخّص اللي صاحب الشركة عايزه: «بروفايل احترافي خاصه بتنفيذ المشاريع تشمل الانجاز وصور المشاريع وجميع البيانات». وعلى الأقسام اللي فوق، شركة المقاولات بتزود:
- المشاريع بالتفصيل: اسم المشروع، المالك أو العميل (بموافقته)، المكان، نوع الأعمال، القيمة، سنة التنفيذ، والحالة (اتسلّم ولا جاري)، وصور من الموقع نفسه.
- المعدات: النوع والعدد، ومملوكة ولا مؤجرة.
- الفريق الفني: عدد المهندسين وتخصصاتهم وسنين خبرتهم، ومين مدير المشروعات.
- القيد في اتحاد المقاولين: التسجيل في «الاتحاد المصري لمقاولي التشييد والبناء» بيتطلب في مناقصات حكومية؛ مثلًا هيئة المجتمعات العمرانية الجديدة طرحت مناقصات «بين الشركات المسجلة بالاتحاد المصرى لمقاولى التشييد والبناء» (بوابة الأهرام، ٨ نوفمبر ٢٠١٦). حط شهادة القيد زي ما هي، وأي تصنيف أو فئة مكتوبة فيها انقلها بالحرف، من غير تقريب لفوق.
- الجودة والسلامة: شهادات ISO أو غيرها لو عندكم فعلًا، وتاريخ انتهائها.
وسابقة الأعمال؟ في المناقصات بيتطلب كمان ملف «سابقة الأعمال»: جدول بالمشاريع اللي اتنفذت. ده غير البروفايل: البروفايل بيعرّف بالشركة كلها، وسابقة الأعمال بتثبت الخبرة في نوع شغل معيّن. المهم إن الاتنين يطلعوا من نفس الأرقام بالظبط، ولو كراسة الشروط طالبة شكل معيّن، املاه زي ما هو. ولو عايز نفس المشاريع دي تبان على موقعك كمان، شوف مواقع شركات المقاولات.
البروفايل يبقى PDF ولا صفحة على الموقع؟
الاتنين، ولكل واحد شغلانة:
- الـPDF بيتبعت على واتساب والإيميل، وبيتطبع، وبيتحط في ظرف المناقصة. خليه خفيف: بروفايلنا نفسه نسخة الطباعة بتاعته ٦٫٢ ميجا، فعملنا نسخة للإيميل ٣٫٢ ميجا، لأن خدمة الإيميل اللي بنبعت بيها بتطلب كل مرفق يكون أقل من ٤ ميجا.
- صفحة على موقعك بتتلاقي على جوجل، ودايمًا عليها آخر نسخة، ولينك واحد تبعته بدل ملف. وحط عليها زرار لتحميل الـPDF.
الشرط الوحيد: نفس الأرقام في الاتنين. لو الموقع بيقول رقم والبروفايل بيقول رقم تاني، القارئ هيشك في الاتنين.
بروفايل «جاهز للتعديل» ينفع يكسب مناقصة؟
«بروفايل شركة مقاولات جاهز للتعديل مجانا» من الاقتراحات اللي جوجل طلّعها لنا، يعني ناس كتير بتدوّر على قالب. القالب بيديك شكل، بس اللي اللجنة والعميل بيدوّروا عليه مش الشكل: المشاريع بقيمها وسنينها، والشهادات، والفريق. ودي حاجات محدش يقدر يكتبها غيرك.
والقالب بييجي بصفحات عامة جاهزة: رؤية ورسالة، وصور ستوك لأوناش ومباني، و«نحن شركة رائدة». لو سبتها زي ما هي، الملف مش هيقول حاجة عنك، وممكن يشبه ملف منافس نزّل نفس القالب. ولو غيّرت كل كلمة وكل صورة ببياناتك الحقيقية، القالب ممكن يمشي. يعني السؤال مش «قالب ولا تصميم»؛ السؤال: بياناتك فيه ولا لأ؟
إزاي تعمل بروفايل لشركتك؟ جهّز دول الأول
قبل أي تصميم، اجمع الحاجات دي في فولدر واحد. بيها أي مصمم يقدر يشتغل، ومن غيرها أحلى تصميم هيطلع فاضي:
- سنة التأسيس، عدد الموظفين، والأماكن اللي بتشتغلوا فيها.
- قائمة المشاريع أو العملاء: الاسم، السنة، الحجم أو القيمة، ومين موافق يتذكر اسمه.
- صور حقيقية: الشغل، المكان، الفريق، المعدات.
- الشهادات والأوراق الرسمية، سارية.
- اللوجو والألوان والخطوط بتاعة الشركة.
- اسم الشخص اللي هيرد، ورقمه وإيميله.
الخلاصة
- الترتيب: مين إحنا بالأرقام، بنعمل إيه، عملناه لمين، بنشتغل إزاي، الفريق والأوراق، ومين يرد.
- كل صفحة لازم تثبت حاجة واحدة للقارئ، وأهم قسم هو الشغل والإثبات.
- في شغلنا، ٥ من ٧ بروفايلات وقعت بين ١٣ و١٨ صفحة، والعدد على قد الإثبات اللي عندك.
- شركة المقاولات بتزود: المشاريع بالقيمة والعميل والسنة، المعدات، الفريق الفني، وشهادة القيد في الاتحاد زي ما هي.
- اعمل PDF خفيف للإرسال وصفحة على موقعك، بنفس الأرقام.
- القالب الجاهز بيديك شكل؛ اللي بيقنع هو بياناتك.
لو عايز نعمله معاك. بنعمل البروفايل على هوية شركتك وبالترتيب اللي فوق، وصفحة تصميم بروفايل الشركة فيها نماذج من شغلنا. ولو محتاج البروفايل والموقع مع بعض بالعربي والإنجليزي، باقة Tender-Ready فيها الاتنين وأول شهر محتوى بـ٢٢٬٠٠٠ جنيه، في ٧ أيام عمل من يوم ما تكمل معلوماتك.
أسئلة بتتسأل كتير
إيه محتويات بروفايل الشركة الأساسية؟
بالترتيب: الغلاف، مين إحنا بالأرقام، المشكلة اللي بتحلّوها، الخدمات أو المنتجات، الشغل والإثبات، طريقة الشغل، الفريق، الأوراق والشهادات، وفي الآخر بيانات التواصل باسم شخص ورقمه.
بروفايل الشركة يكون كام صفحة؟
على ٧ بروفايلات عملناها، العدد كان بين ٩ و٢٧ صفحة، و٥ منهم بين ١٣ و١٨. العدد بيتحدد بالإثبات اللي عندك: مشاريع وعملاء وأرقام، مش بصفحات حشو.
أكتب إيه في «نبذة عن الشركة»؟
سنة التأسيس، حجم الفريق، المجال، الأماكن اللي بتشتغلوا فيها، وأهم رقم عندكم. أرقام بدل كلمات زي «رائدة» و«خبرة طويلة».
إيه اللي لازم يكون في بروفايل شركة مقاولات؟
فوق الأقسام العادية: المشاريع بالقيمة والعميل والسنة والحالة وصورها، المعدات مملوكة ولا مؤجرة، الفريق الفني وتخصصاته، شهادة القيد في الاتحاد المصري لمقاولي التشييد والبناء زي ما هي، وشهادات الجودة والسلامة لو موجودة.
إيه الفرق بين بروفايل الشركة وسابقة الأعمال؟
البروفايل بيعرّف بالشركة كلها، وسابقة الأعمال جدول بالمشاريع المنفذة بيتطلب في المناقصات عشان يثبت الخبرة في نوع شغل معيّن. لازم الاتنين يطلعوا من نفس الأرقام.
بروفايل جاهز للتعديل ينفع؟
ينفع كشكل بس، ولو غيّرت كل كلمة وكل صورة فيه ببياناتك الحقيقية. الصفحات العامة اللي جاية معاه وصور الستوك مابتثبتش حاجة عن شركتك.
البروفايل يبقى PDF ولا على الموقع؟
الاتنين: PDF خفيف للواتساب والإيميل والطباعة والمناقصات، وصفحة على موقعك تتلاقي على جوجل وتفضل محدّثة، وبنفس الأرقام في الاتنين.